Mizote Krismas

Kan Mizo Krismas hla phuahtute chim chin kha a sang asin.

A duh duha a tih theihte hi hmangaih tawp lova a hmangaih avanga chung lamin ro a relnate hi mawi takin, tlar khat lekah, van atanga khawvel chhunin, Kalvari tlanga hmangaihnain a hawlh phel dan hi an han phuah chhuak thei bik thin a nia, an rau lo tia sawi ngam rual an ni lo.

Patea khan, “Mal min sawm turin van khuaan ro a rel,” a’n tia. A siam, a duha a tih theih, a duh huna a lak theih mihring nep tak hi hmangaih avanga min zawng tur leh chhandamna tur hian, engkimtithei kha lei mi zinga a lo chen dawn khan van khuaah khian kan thatna turin ro a rel asin!

A la duhtawk lo, Lalberte Lalber, Zion roreltu ni bawkin min hmangaihna hi a va han hmu chiang tak, “Engtia awm thei nge mihringah?” a ti a; ni e, min hmangaih avanga mihringa kan Pathian lo chang hi a hmu chiang apiangin mak an ti a, an sawi zo thei lo.

Kan kungpui ber mai, Upa Rokunga khan Lal Isua vanga lei leh van lo inrem leh ta hi a va han hmu fiah bik tak, “Hmangaih tuipui a fawn, a kuang a fawn liam e, a liamin paillei a bualin, Van miten zai an rem,” a ti a, a sang a sin!

A hla dangah a sawi chhunzawm a, “Ka hril thiam lo, ka puang zo lo, a ropui leh mawizia chu, chhiarin hrethiam tehreng ila, nun pawh hlan hian ka mawi e,” a ti a. Ni e, min hmangaih avanga nun hlantu hmangaihna hmu chiang apiang hian an hril seng lo, an hril zo thei hrek lo; kan tana nun hlantu hian kan theihtawp hlan ve hi a phu reng a ni.

Mitdel ni si, Suakliana khan a hmu fiah bawk, “Zion ropuina Lalpa, boral min zawngtu chu,” a’n ti a; a la duhtawk lo, “Engkima engkim chungah Lalber rawh se, Amen, min hmangaih hi tuman an hnial thei lo,” a’n la ti zui a. Hnial rual a ni lo reng a ni.

Bethlehem dai phul lengte kha an va ngai nawih ngawih thin em! Patea bawk khan, “Ngaih a na e Bethlehem tlangpui, tlai ni tla êng lenkawl a khum riai e,” a’n ti a; “I chun leh zua kara senlai nau ang i tahna hmun tual ka ngai,” tiin Bethlehem kha a ngai ngawih ngawih mai a ni.

Upa Rokunga chuan, “Aw, chu hmun chuan ka lung min len, thinlai hrui ang min rawn vuan e, siar leng pawh a liam thei lo, kawlkungah châm reng e,” a ti vawng vawng mai a ni.

Mizote Krismas siamtu an ni a, Krismas ti-Krismas-tu an ni a, Bethlehem ti-Bethlehem-tu leh tiropuitu ber chu kan hla kungpuite hi an ni hial ang.

Paris, i daw! ‘Selfie hi i tihchhuah a ni lo’

Tunlai khawvel thalaite zinga tawngkam lar ber pakhat chu ‘selfie’ tih hi a ni pha ve ngat ang.

November 19, 2017 khan hlimhlawp khawvela mite lawm em em thin, mi hausa tawntaw ni bawk, Paris Hilton chuan Twitter-ah Britney Spears nena an thlalak dun chu post-in, “Kum 11 liam taah khan kei leh & Britney hian selfie kan tichhuak!” tiin a thlalak chungah thu a dah tel (captioned) a, kum 2006-a an pahniha an lak dun, anmahni an inhmeh (selfie) chu pho chhuak a. Selfie tichhuaktuah a inchhal a; mahse, a lo ni lo, Paris Hilton-i hi a daw tlat!

Hilton-in thlalak leh thu a post hi amah zuitu (follower)-te leh mi dangin an chhang let nghal sap sap a. Ni e, an tihchhuah a ni lo, kum 167 zet liam tawhah pawh khan mahnia thla inlak hi an lo ching daih tawh zawk a lo ni.

1839: The trailblazer:
Photo selfie hriat theih hla ber chu hemi kuma mi daih tawh hi a ni a, kum 30-a upa tlangval, Robert Cornelius chuan Philadelphia-a lamp shop hmaah a lo selfie daih tawh. Hetih hun lai hian engtin nge mahnia thla inlak hi a tih theih hi hriat ni chiah tawh lo mah se, a hun laia an thlalakna ngaihtuahin hetianga mahnia thla inlak tur hian a lo berah minute 15 vel chu che lo chang lova a din chu a ngai ngei tura ngaih a ni.

1914: Teenagers get on board:
Hei chu ‘mirror selfie’ kan tih ang hi a ni a. Hilton-i thlalak post chhangtu zinga pakhat, Leah Cohen chuan he thlalak hi a post ve sak mai a, hetianga thla inlak hi kum 2000 chho vel atanga chin uar tan chauh chu a ni mai thei a; mahse, tuna thlalak hi chu kum 100 liam tawhah khan, Russian lal chhungkua (royal)-a mi, hetih laia an Emperor fanu, Grand Duchess Anastasia Nikolaevna chuan kum 13 mi chauh a nih laiin darthlalang hmaa dina mahni thla lak hi a lo ti daih tawh.

1920: Your dad discovers selfies:
New York photographer Joseph Byron chuan kum 1920 khan inchung zawlah, a thiante nen an lo selfie daih tawh bawk a; mahse, an thlalak en hian khawiah nge camera hi an dah a hriat mai theih loh. Hetih hun laia an thlalakna hi chu a lian a, thingrem lian tak a ni a, an zinga mi pahnih hian an keng nia ngaih a ni.

1938: Celebs get involved:
Kim Kardashian leh Kylie Jenner ten bual ina thla inlak (bathroom mirror selfie) an chin hma daih tawhah hian, Frank Sinatra chuan a lo ching daih tawh mai a. Kum 23 mi chauh a nih lai, a la lar hma khan bual inah a thla lo inlak daih tawh.

1966: The gap year kid’s Instagram is invented:
A hun lai mai ni lo, tun thlenga band lar, Beatles chuan hetih lai hian Asia an fang a, India ram pawh an rawn tlawh a, an guitarist George Harrison chuan fish-eye lens hmangin Taj Mahal lang theiin a thla a lo inlak tawh bawk.

2002: ‘selfie’ thumal:
Australian-ho hi thumal tihtawp hrat an ni a, ‘-ie’ belh ching an ni a, ‘barbie’, ‘tinnie’, leh ‘sunnies’ te pawh. Self-portrait pawh hi Australian online atangin kum 2002 khan a darh ta a. Nathan Hope chuan a kum 21 tlin champhaa a thiante nena an lawmnaa a hmui zai kak thla a inlak a post chu, “sorry about the focus, it was a selfie,” a ti a, heta tang hian selfie thumal hi hman a ni ta a ni.
A lar chho zel a, kum 2013 a lo nih phei chuan dictionary rintlak, Oxford English dictionary chuan ‘selfie’ tih chu word of the year atan a thlang chhuak ta hial a ni.

December 3, 2017
Inrinni

Pute u, min bum leh rawh u!

Kum nga danah in intiawihawm a, in intihmeltha a. Pute u, lem in chang tih hre reng chung hian, keini mipuite hi min bum leh dawn tih kan hre reng a sin.

In thiam hi ka tia, British-hovin an vanglaia an ram awp tumte hneh dan thurûk tha tak an nei ang deuh kha in ni mai hian kan hmu. Kum nga zet min han hrêk tak tak chinah chuan tâm tak takin kan tâm lo thei lo va; chutah in rawn kal a, in han intirinawm thar ta tak tak a; eng eng emaw min han sawi hmuh a, ‘tâm tawk apiang a tui,’ an tih ang zawng zawng kan nei zo va, a thlawna dawn theih ang chi min zawrhte hi hnar thei dinhmunah hian min siam hlawl lo a ni.

Ni e, pute u, mipui chu kan â min ti mai thei a. At pawh kan â ta ve ang; mahse, in mi hrêkna zozai hi ngaihtuah ve ula, â tak tak lo pawh ât der ngai khawpin min siam tlat alawm. Pa fing âwm pui pui pawh ngati nge in thusawi, a tak thleng lo tur tih kan hriat sa rengah hian an tluk leh thin min zawt maw? Tlu lo sela mahni lu zuar tluk lek a ni mai dawn asin, engkim mai hi kan râwp zo tawh a nih hi!

Mipuite hi min bum leh rawh u, bumtlak lek kan ni; mahse, pute u, kum 30 vel state puitling ni tawh chunga chawmhlawm kan la ni reng bik hi, phai vaiho zingah, in biak thin Pathian be ngai lote kiangah hian engtin nge in insawi mam thin tih kan lo ngaihtuah ve thin.

Keini mipuite hi chu kan mâwl êm mai a, in bum tawk lek kan ni a. Kan ram chhengchhiatzia leh leilung hausakna kan neih lohzia hi kan lo hre pha ve tumhrang a, insawi mam dan in hre viauin kan ring a. Mahse, chutih lai vek chuan maw pute u, ‘engkim that duhna ram’ tia lo neitu leh kut hnathawk rethei bakberh tak takte hmaa in sawi thin hi a tak a ni lo em ni?

Dawt sawiin heng lo neitute hi in bum em ni? An taima lo tih dawnin, an nih kan ring chiah si lo; mahse, ram danga thawn chhuah theih khawp an thar lo a nih pawhin, he rama Mizo tlem tê chengte kham hi chu thar âwm hi an ni asin. A bul chu maw pute u, han chhui han chhui ila, nangmahni hi in nih leh bawk kan ring tlat.

Pute u, nangni chuan dawhkan ropui kilin, khawlthluaknei leh hmanraw changkan nen kan ram hmasawnna turin in titi a, in inkawm a, in thawk a ni mai thei a, sorkar sum chevel leh hman dan zawng zawng inruahman dan hi kan hriatpui phak lo che u. Chutiang chiah chuan kan kawngpui chhiate hi nangni chuan inthlawh khûm fo thin a nih avangin kan hriat chian tluk hian in hre ve phak bik lo mai thei.

Ni e, tlangram ngang kan ni a, ruahtui kan dawng tha a. Hei hi kan kawngpui neih ve chhun tichhetu lian tak pawh a ni ang, in sawi zawng zawng hi a awihawm loh vek bik lo. Mahse maw pute u, tunlai inbiakpawhna that tawh zarah keini ai maha ruahtui dawng tha ramah hian an kawngpui hi rulngan pa ang zar a ni tih hi kan lo hmu pha veleh thin si a, kan lu hi a hai a. Min bumna leh tho a nih kan ring laklawh tawh.

Nangni chu in fing a, in khawhawi pawh a zau va; mahse, mawl takin heti hian kan ngaihtuah a. A thlawna sum insem leh intawktarh zozai avang hian kan ram hian hma a sawn phah em tih hi kan lo thlir ve thin. A thlawna in sem zozaite hi lo thatpui tawk chu an awm ang; mahse, a hlawhtling tih in sawi zin ngaihtuah hi chuan a chuti lutuk lo em maw ni kan lo ti ve a ni.

Gas vân dante hi nangni chuan chanchinbu leh chanchin thara in chhiar bak hi a takin in tawng miau lo va, a awmzia leh a hrehawmzia hi inhre pha tak tak lo. Mahse, mawl takin ngaihtuah ve teh u, nutling patling, gas bur khat duh avanga insual inpeih at khawpa kan tâm tawh chinah hi chuan kan thil râwp hi a na tawk ang tih a chiang.

Kristian kan ni a, gas bur khat vang mai maia insual duh uaih uaih khawp nih chu a zahthlak tih hi kan hai lo, mi â nileng kan ni bik miau lo va; mahse, kan upaten, ‘Fate riltama an awm laia thenawmte buhzem rawk ngam lo chu pa a tling lo,’ tih ang deuh tawngkam kha kan nei em kha, Kristian kan nihna pawh ngaihtuah thleng thei lo khawpa mamawhna nasain min siam a ni ta deuh ber mai.

Pu duhtakte u, hmana in inzawrhna zawng zawng kha in enlet ngam em tih hi hmaichhana zawh châk châng che u kan ngah mai. ‘Switzerland of the East’ in sawi hun lai te, ‘Mi retheite hi kan VIP an ni,’ in tih laite kha kan la hre reng a, a thlawna in sem tur sum avanga kan rama lo hal a bo deuh duak turte pawh kha ngaihthlak a nuam a; kan thla intimuang a, sum nei leh sum nei hi kan intawk deuh suau suau dawn ni khan kan mitthla hman a; mahse, min bumna lek chu a lo ni si.

Thil ngaihtuah thui loh deuh in nei em maw ni tiin kan lo ngaihtuah ve mai mai bawk. He khawvel hi thawkrimte hlawhtlinna ram a ni zawk tih hi keini aia fing chuan in hre lo chu a ni lo vang; mahse, awlsam taka neih theih min zirtir hi in tifuh lo niin keini chuan kan hria a ni.

Mi hlawhtling zingah hian remchang tha an hmuh avanga hlawhtling chu an awm zauh zauh mahna; mahse, a tam zawk hi chu thawhrimna avanga hlawhtlinga chhiar an ni. Nangni chuan chutiang chu in chhut lo em ni kan hre lo, a thlawna sem tur kengin mi retheite kiangah in rawn inzuar a, keini mi mâwl, hmuh phâk apiang ît mai zel khawpa in hrêk riltam tawh ni bawk si chuan kan lo bawh huam huam lo thei lo va, kan nêp phal lo va, nêp thei dinhmunah lah kan ding hek lo. Chumi rah kal zela a sawp hi a na lutuk ang tih hi kan hlau a ni.

Pute u, a lang maia min bumna, in intiamna, in insawi rinawm laia in inzawrhna tam tak, in tihhlawhtlin tâk loh hi chu thil pawi a ni thui lutuk lo mai thei a, tunlai chhuante bâk tuar tur kan awm lo mai thei; mahse, hei aia pawi zawk chu kan rilru sukthlêk in suasamna hi he ram leh hnam hian a la tuar chho zel mai thei.

Thawk lova neih theih, a thlawna dawn theih thil min sihhmuh laklawh a, kan rilru hian kawng engkimah hah lova neih dan hi a dap chho ruai tawh ang tih a hlauhawm kan ti. He hun hi a thlen vaih chuan, a lang maia min bumna aiin he thil hian kan ram leh hnam hi a sawp nasa zawk dawn. Chutih hunah chuan a mawhphurtu kan inzawng ang a, nangni hi kan kawk lo thei lo vang che u.

Pute u, tunah hian in hun a intan leh dawn mek a, keini chu kan ât piah lamah kan dinhmun hi a hniam tawh êm avangin, tawktarh chhe têtê in hman apiang mai hi lo awih loh tum mah ila, kan nep thei ngang si lo va, min bum dawn tih hre reng mah ila, in mi khawngaihna der chu kan lo awih leh dawn chiang mai.

Min han bum leh phawt mai ula; mahse, a mawh erawh phur ngam ve turah kan ngai ang che u.

12th November, 2017
Pathianni
11:38 PM

MIZO TAWNG LEH FILM LETTUTE

Mizo tawng hi a hmangtu kan tlem ngaihtuah hian a har a, a tawng mai ni lo, a ziah dan chungchangah phei chuan thiam inti (inti tih hi tihelna lam a ni lo)-te thu pawh a rual tak tak thei lovin ka hria.

Kei pawh hi a thiam lo ber zinga mi chu ka ni a; mahse, tun hnaia hnam dang tawng thiam zawkten tawng dang film tha tak tak, kan tawnga hmuhnawm taka min lehsaka an tawngkam hman chungchangah hian sawi ve châk deuh deuh ka nei a, an leh dan hmang hi dik lo hi a awm veleh zauh zauh ni hian ka lo hria. Dik lo ti ila, dik lo chiah pawh a ni lo, an leh dik leh lutuk avanga dik lo ta zawk thenkhat pawh a awm a, pahnih khat lek sawi ve ka duh a ni.

Dik si lo dik
Mizote hi chhungkhat inkoh dan bik nei kan ni a, unau sawinaah phei hi chuan tawng hausa an tihte ai mah hian kan nei tha zawk ni hian ka lo hre thin a. Hei hi saptawnga a awm ang ang hian tawng lettute hian an let a, saptawnga a nihna atanga teh chuan an let dik a; mahse, Mizo tawng hian a dik lo ta thung thin.

Mizo mipa hian pianpui unau hmeichhe fate hi ‘tunu/tupa’ tiin kan sawi thin a; hmeichhia pawhin a pianpui mipa fate chu an ‘vahnu/vahpa’ bawk thin a. Hei hi ka hriat sual hle loh chuan saptawng lamah chuan vahnu chu ‘niece’ leh vahpa chu ‘nephew’ a ni a. Sapho chuan mipa pawhin ‘vah’ an nei thei tihna a ni a, an unau fate hrim hrim chu an ‘vahnu/vahpa’ a ni tihna a ni.

Sap mipate chuan Mizo mipaten ‘tunu/tupa’ kan neih hi an nei ve lo va, mipa pawhin ‘vahnu/vahpa’ an nei zawk tihna a ni a, hei hi J.L.Laidailova dictionary lama a lan dan pawh a ni a. Sap chuan hmeichhia pawh, mipa pawhin an unaute fate sawi nan ‘niece/nephew’ an hman vek avang hian Mizo tawnga lettute hian dik thlapin ‘vahnu/vahpa’ tiin an let ta vek a. Hei hi kan Mizo inkoh danah chuan a dik famkim lo va, mipa pawhin an farnu fate chu a ‘tu’ ni lovin a ‘vah’ ta thin a, mipain ‘tu’ an neih thin chu ‘vah’ an neihtir ta zawk thin a ni.

Sawi tawh angin a saptawng lam atanga en chuan a dik lo miah lo va, an let dik thlap a; mahse, tawng lettute hian Mizo mipui en tur a ni tih hriain a dikin, saptawng nen en milin dik lo mah se mipa chu ‘vah’ neihtir lovin ‘tu’ neihtir sela, inlaichinna kan sawi dan hmang kan neih hi nakin zelah thangthar zawkten an lo hriat loh phah palh a hlauhawm thei dawn riauin ka hria a ni.

Unau sawina
Hetiang deuh bawk hian unau kan insawi dan pawh hi a ni tho mai. Sapho chuan pianpui unau hmeichhia chu ‘sister’ an ti vek a, pianpui mipa chu ‘brother’ a ni vek bawk. Mizo kan inkoh leh sawi danah erawh a sawitu azirin ‘laizawn, nuta, farnu’ tiin a awm hrang vek thung.

A sawitu mipa a nih chuan a unau hmeichhia chu ‘ka farnu’ a ti thin a, a sawitu hmeichhia a nih chuan a unau hmeichhia chu ‘ka laizawn/laizawnnu’ a ti thin a, a sawitu hmeichhia a nih chuan a unau mipa chu ‘ka nuta’ a ti thin thung.

Saptawngah erawh chuan chutiang a ni lo va, mipa pawhin a pianpui unaute chu a‘sister/brother’ vek a, hmeichhia pawhin chuti tho.

Saptawng atanga kan tawnga an leh hian hmeichhia hian a hmeichhiatpui, a pianpui hi an ‘unaunu’-tir fo va, mipa chu a ‘unaupa’ deuh zel bawk a. Tin, mipa pawhin a farnu chu a ‘unaunu’ ta deuh zel
bawk.

Hei hi chu an let dik chiah tho va, thangtharte hian kan unaute sawi nan ‘farnu, laizawn leh nuta’ tih hi kan hman tam tâk loh avangin hetianga inkoh/sawi tur a ni tih hi an hre lo a ni thei mai thei a. A
nawlpui pawhin kan inhrilh thar leh a ngai viauin ka hria.

Mizo tawnga unau sawina, a sawitu chu hmeichhia nge mipa a nih awlsam taka hriat mai theihna, tawng hausa zawk pawhin an neih loh kan neih hi a bo mai ang tih a hlauhawm hlein ka hria a ni.

Lawmna sawina
Ka lo ngaimawh ve thin pakhat dang leh chu, Mizoten kan hman ngai loh nia ka lo hriat, sap leh hnam dangin an hman si, Mizo tawnga dah chhuah dan pawh dik; mahse, ni lo deuh riauva lang thin hi a ni.

Entirna pakhat lek lo tar lang ta ila. “Engkim vangin ka lawm e,” tih hi Mizo hian kan hmang ngai meuh lovin ka hria a; mahse, hnam dang hian an hmang nasa a nih ka ring, Mizo tawnga an leh film-ah hian an hmang sek mai a. An leh dan tawngkam hi ka lo ngaimawh thin.

Saptawngah chuan, ‘Thanks for everything’ tih vel a nih ka’n lo râl rin ve ngawt a. Tawng lettute bawk hi a tidiktu chu an ni a, ‘Thanks for everything’ tih hi a nih ngai chuan an let dik thlap a; mahse, Mizote hian an leh dan tawngkam tak hi kan hman ngai loh (hmang zeuh zeuh chu an awm mai thei) tak a nih avangin a awze tawng deuh hu hian ka hre thin a, heti lo deuh hian let sela ka lo ti thin.

Entir nan, an lawm thu sawina azirin, “I thil min tihsak zawng zawng avangin ka lawm e,” tih te,“Min buaipuina avangin ka lawm e,” tih ang chi deuhte pawhin a theih ka ring.

Dik, tha leh nalh zawkin
Mizo tawng lama kan mi thiam zawkte hi kum lama upa leh tul tak tak, kan sawi film-te pawh en ngai lo leh en hman meuh lo an ni hlawmin ka ring a. Ka sawite pawh hi hetiang hian an let a ni tih hi an hre ve pha kher lo vang, an lo en chik ve phah tak mial leh a tha zawk an rawt chhuah theih nan ka thai ve mai a ni a.

A tira sawi angin kan tawng hi a har si a, ziah chhuaha leh mai hi chu a la harsa lo zawk a, film-a chhuah tur, a changtute hmui phui nena inmil tur phei chuan a harsa lehzualin a rinawm takzet a. Chutih rual chuan film lettu, saptawng leh Mizo tawng thiam kawp tak takte hi chuan dik si, fiah si, nalh bawk sia tih dan chu an thiam em emin ka ring a ni.

Tawng hman dik tawk lo ka sawite hi a lettute hian min chhuahchhal let ang tih ka hlau viau mai a, kan en hnem tawh si a, ‘chumi film-ah chuan in hmang’ han tih nalh turin film hming bik sawi chhuah mai tur ka hre lo va, a hman erawh an hmang nasa tih erawh ka tang ngam.

KA PU MAYWEATHER

“Ka pu,” ka tih rual che chu i la ni bik lo tih ka hria; mahse, ka dinhmun leh i dinhmun a inthlauh êm avang hian ka pu lo ngam lo che a ni. Ka pu, nang chu i lar a, i theihna boxing-ah hian tumahin an tluk lo che a, khawvel hian a theihnghilh tawh dawn lo che. I duh duh i nei thei tih pawh ka hria, i hausakna zawng zawng hi keini chuan kan chhut chhuak thiam phak lo zawk a ni.

Min hre lo
Ka pu Floyd Mayweather, Mizoram hi i hriat ka ring lo va, Aizawl phei chu hriat tumin i google phekah khan vawi khat pawh i la zawn (search) chhin ka ring lo, i tan hriat a tul miau lo a ni. Kan thiam lo lo che.

India chu i hre vein ka ring a, kan khawpui, New Delhi leh kan khawpui lian zual deuh deuh hi chu i hre ve mai thei a, i lunglên deuhva i inngaihtuah fuh châng chuan kal châk ve deuhna hmunte pawh i nei ve mai thei. Mahse, India ram kilkhawra Mizoram hi chu i hre lo tawp ang tih hi ka chiang a ni.

I hming leh sum
Kan ramah hian, kan mi hausa deuh thenkhat chu an hausak turzia hi kan lo chhutpui ve zauh zauh thin a; mahse, nang anga an hming leh sum sawi zawm reng reng an la awm lo.

Nang chu i ni ve lo, i hming leh sum hi a inzawm tlat a, media lamin ‘Money Mayweather’ an tih che pawh hi kan lo hre phâk ve vek. Hman ni lawka Conor McGregor nena in inhnek pawh kha ‘Money Fight’ te kha an ti mai mai, i hausa tih hi a va chiang tak!

Keini chu kan dam chhungin thawk pawh ni ila, kan hming leh sum hi engtikah mah miin an sawi zawm ka ring lo. Sum nei tur hian keini chu rim takin kan thawk a, nang chu a rawn pan zawk che ni maiin kan hria. Inhnek tura i inbuatsaihna hautakzia kan hriatpui tho chung che hian, nang hi chu sum hian a bawmin a bawm bik che ni hian kan hre deuh reuh tlat nia maw le!

McGregor nena in inhneka i sum hlawh te, Manny Pacquiao nena in inhmachhawn tuma i hlawh te, a bak dangte pawh kha... kan lo hriatpui ve vek che. Mahse, a tam lutuk a, keini chuan a tam turzia hi kan chhut chhuak thiam lo. A takin i hlawh zawng zawng hi hmu phei ila chuan thidang nawn awn awn tur hi kan ramah hian kan tam ngawt ang.

En mah teh, i hlawh kan sawina lamah hian maktaduai hi kan lo lam sek ve lo thei lo. Kan la hmuh miah lo khawpa tam sum hi tlangnel takin kan lam ve tak bawrh bawrh a, a dik tak chuan maktaduaia tam sum hi inthlahrung taka sawi tur tawk lek lek hi kan ni a; mahse, nangmah avang hian tlangnel takin kan lam phah ve ta ni hian kei chuan ka hria a ni.

I car man tote hi aw...
Ka pu, nang chuan car ringawt pawh hi 100 chuang i nei niin an sawi che, kan va inthlau chiangkuang tak! Keini chu pakhat pawh nei pha lo hi kan tam lutuk!

Kan zinga lirthei lawm deuhvin khawvel car man to nia an sawi - Rolls Royce, Bentley Mulsanne te, Bugatti Veyron te, Lamborghini Aventador te leh a dangte pawh, an hming hi an lam ri ve feih feih ngam chauh va, nang erawh chuan khalh sên loh i lo hung tlar leh dul hman tawh a. Khawvela car tha leh chak hi i neih loh a awm meuh lo.

He khawvela car heti zat awm zinga amah ang dang pakhat chiah awm nia an sawi, $ maktaduai 4.7 man zet, Koenigsegg CCXR Trevita an tih pawh nang chuan i lo kawl leh dim diam tawh bawk. Keini chuan a hming ringawt pawh hi kan lam thiam mang lo asin.

A sawi zui thui peih deuhho phei chuan Los Angeles khawpuia i lirthei hunna hmunah car dum rual (fleet of all-black cars) i hung a, Miami lamah a var rual (fleet of all-white cars) i hung bawk niin an sawi a. An sawi uar lutuk a nih kan ring lo.

Vansang leh tuipuiah pawh
Hei mai a ni lo, vansang lama i lên duh chânga i chuanna, i mi mal thlawhna (private jet) tha leh chuan nuam chungchuang, kan mi hausa berte inchhung ai pawha nuam tur i neihte pawh tunlai inbiakpawhna tha zarah kan lo hmu pha ve hlauh va. Vawi khat pawh thlawhna ticket la hum ve ngai lo keini ang chuan a hlutzia kan pawh phâk thlawt lo, min dem bik suh ang che.

I nawmchenna lawngleng (yatch) te phei hi chu balu lakna lawng bak la hmu lo tan chuan mitthla pawh kan mitthla thiam lo hrim hrim. A man an han sawi a, “A va to,” tih bâkin kan sep zui thiam lo. A thlalak kan han en a, a chhung lah chu keinin Vanram kan suangtuah aia a nawm lohna tur a vâng khawp mai lehnghal. Em em che hian aw...!!

I zâlna man a to lua
Ka pu, mihring ve tho i ni a, i mut a ngai ve tih kan hria a, hahdam taka mahni in ngeia thut thlan daih pawh i ching ve ngeiin kan ring. I chenna in chanchinte pawh kan lo chhiarin kan lo hmu a, a ropui kan tih piah lamah rapthlak kan ti.

In i neih zat hi zawt thut che ila, i sawi nghal thei mai ang em? Sawi nghal thei mai lo pawh ni la kan dem lo vang che, LSC pakhat chauh i nei miau lo va!

I duh chuan Las Vegas-ah i riak thei a, Los Angeles i ti thei a, Miami i ti thei a, a dang pawh i nei teuh. I in khawiah pawh hian zan khat chauh min thlentir ni la, keini chu kan mu lo vang, kan mu phal dawn lo; mut aia min tihahdam thei thil, kan hmuh ngai loh ennawm mak thar a tam dawn lutuk!

I in hrang hranga i mut pindanah hian riak kim vek dawn ni la, i bual in neih zawng zawngah hian inbual kim vek tum ni ta bawk la, kum chanve vel hi chu ni tin zan tin i phar buai a ngai mai lo maw kan ti a ni.

Mahse maw ka pu....
I hausak leh duh duh nei thei i nihzia hi ziakin sawi dawn ila, kan hril seng lo lek lek mai thei! Mahse, thil pakhat ka hrilh ve mai mai ang che, lo ngaithla rawh. Ka hrilh tur che chu hei hi a ni: I neih loh kan nei ve tlat, i awih lo hial mai thei; mahse, a dik tlat si a ni.

En teh ka pu, i neih loh kan neih chu Lal Isua a ni, kha daih kha asin! “A ho em mai!” i ti ve ngawt ang e, a..., i duh leh lo ti leh si rawh, pawi pawh kan ti chuang lo; mahse, keini chuan nang aiin ani hi kan ngaisang a, nang aia kan entawn a ni zawk tho tho.

Khawvela hausakna tehnaah chuan keini ngawt ai chuan i ropui tih hi kan hnial lo che a; i thawhrimna avanga hlawhtlinna i chan zozai leh i sum hlawh chhuahte hi kan ngainep miah lo, kan theih ve loh a ni; mahse, nang hi kan awt lutuk bik lo fo che tih lo hre ve rawh.

Nang chuan rethei awmzia i hre lo va, nangmah siamtu che leh hetiang i nih theih chhan pawh hi i ngaihtuah ngai tawp nang! Keini chuan he khawvela kan awm chhan leh min awmtirtu, kan chunga thil thleng zawng zawng reltu hi kan hria a, a hmaah kan kûn thin.

Ka pu, mihring ve bawk i ni kan tih tawh kha. Hausa viau mah la, eng emaw châng chuan lungngaia indawm kun i neih kan ring a, i hausaknain a hnem theih loh lai che i tawn ve tho kan ring. Kha, hmanah, kum 2012 velah em ni, i bialnu hlui kut i thlak avanga lung in bang i zut ve laite pawh a awm kha, khatiang hun, mihring leh sumin an chhan theih loh hun che kha i tawng ve zeuh zeuh ang.

Khatiang hunah khan i neih loh kan neih bik hi keini chuan kan chhawr thin asin. Ni e, i sumin i lungngaihna leh khawharna a hnem lo vang che, keini chuan hetianga kan awm lai takte hian i neih ve loh, keinin kan neih si hi kan ko va, ani chuan min engtinmah min ti lovin min hnuchhawn ngai miah lo! I hriat ve loh thil tha deuh kan hre ve tlat.

Duh ni la, he khawvel atanga chhuak thil tinreng nei thei i ni a, i hausa tih pawh kan sawi tawh kha; mahse, nang aiin kan rethei bik lo, kan hausa zawk daih. Nang chuan engkim i nei thei a, keini chuan engkim neitu hi kan nei asin. Ka pu, kan hausa fê zawk a lo ni!!

Sept. 7, 2017
1:38 AM

A pual

Car chu sawi loh, lirthei ke hnih em pawh ka nei lo; tin, zan thla eng lawma in chung zawla thut mai theihna tur in nei thian tha pawh ka nei bawk lo; mahse, he hla hian engtin emaw tak min khawih tlat.

Nia, he hmeichhia, a ni, he nula ngei hi ka tan nula bik chu a ni. A bula han awmte hian ka phurh surh ta thin a, ka tha thumte a kiang thin. Thian thate kianga ka tih peih loh pawh kha a bulah chuan tha tho takin ka ti thin a. A bulah hian ka kum hi a tlem ta thut bik a ni lo; mahse, rawlthar tha za rual ang leka che chhuak tur hian a kartu lam a pawimawhzia ka hriat phah a, naupang chhia ang
leka ka chet chang pawh a tam ta ve ang! Nia, a kiangah hi chuan ka naupang sawt zel tlat miau si a ni!

Khuain a rel angin fur hun a awm a, favang ni eng mawi tak hmuh hun a awm a, thla sik nilum ai hun pawh a awm. Thalva ekchara tuikang nghah hun pawh kan hmang liam thin a, chumi hnuah chuan a ni nipui boruak nuam tak hi a lo chhuah thin ni!

Fur laia ruahtui hâka chawrche taka awm zui ta pangpar leh thingte kha thlasik khaw vawtin a'n hmet zui leh a, an tan thal ruah leh nipui boruak nuam chu a thlakhlelhawm thin. Chu hun chu a lo thleng a, pangparten par an chhuang a. Hun hrehawm ber pawh paltlang ila, furpui leh thlasik khawvawtah pawh, he nula hi ka tan chuan 'mi bik' a ni tlat tho.

Ka hmangaihna hi luipui aiin a sei a, a thuk lam chu teha teh sen rual loh a lo. Ka duh ber chu a kianga hun tam ber hman a ni a. Ka hun mai ni lo, he ka nun hi kan hmangaihnaah chuan par
chhuang sela ka ti a, chu chu ka duhsam a ni reng thin.

Ed Sheeran-a angin ka nei nung lo va, thian hausa pawh ka nei lo va. Car-a len chhuahpuina tur pawh ka nei lo va, ka hun hun awl leh a hun awl remchang a innan fuh palh hlauh changa an ina thuttlheng pakhata thut dun a, inkuah a, titi a, a phone khawih leh a TV en lai tibuaitu ni
mai mai hi keia thlakhlelh phak chauh a ni.

Ni e, car-a khaw ram fanga len chhuah hun kan nei lo va, a hmanrua pawh kan nei bawk hek lo. Thian dangte angin khawi lai hmun mah la fanpui lo mah ila, ani ka hmangaihna hi a nep chuang lo va; car chhunga infawp ve kher lo mah ila, an in thim rikreka kan inpawm chial theih aia hlu hi kei chuan khawvelah ka hre bik chuang lo.

Sheeran-a angin thiante inchunga zan thla eng lawma thut pawh ka châk lo a ni bik lo; mahse, kei, mihring azawnga dawihzep ber mai hian amah hi phu lo em hian ka inhria a, miten amah an nuihzat ka hlauh avang zawkin mite hriata pho chhuah hi ka hreh a ni.

“Engvangin maw?” in ti em ni? Ka hrilh ang che. Ka phu lo em a, kei ang mai mai nen hian an inzui tih hi miin hre ta sela, kei hi vannei min titu chu an tam ngawt ang, ani erawh, “A va thlang uluk lo ve,” tiin an dem ang a, thenkhat phei chuan an nuihsawh hial dawn asin.

Chutianga miin an sawi emaw, an dem emaw, phu tawk aia hniam zui anga an sawi tur chu ka ngaingam lo va; an nuihsawh lehlek phei chu a ngaihtuah pawh ka ngaihtuah ngam lo. Chuvangin, inthlahlel tih hriat taka inkhawm bâng inzui haw te, dawra kal dun leh kan chawlh vena phak tawk thingpui dawra chawlhpui tih vel pawh duhin châk ve thin mah ila ka puitlin ngam ngam ngang lo
a ni.

Ka hmangaih, ka dawihzep avang hian min ngaihdam rawh aw...!! Dawihzep ber kher i thlang hi tifuh lo i inti a ni mahna; mahse, mi sawi kaia i awm tur hi ka ngaingam ngang si lo va, dawihzep chan ka chang ta mai a nih hi.

Nula leh tlangval, in duh leh inhmangaih takte thu dun ta chu, chung lam pawikhawih lek lek (?)-a chet chang pawh kan nei; mahse, ani hi ka ta a nih hma chuan ka khawih chhe lo vang. Pathian ka zah a, Pathian hi zah lo pawh ni ila amah ka zah vang talin ka khawih chhe lo vang, ka ta a nih hma chuan.

An ina ka len apiangin min hmangaih leh hmangaih loh ka zawt fo va, “Ka hmangaih che,” a tih lai hmel ai hmuhnawm dang reng reng ka la hmu ngai lo. Ni e, kei pawhin ka hmangaih a, hmangaihna khura nula leh tlangval tlu lut chu a hlim pawh kan hlim tur a ni reng a ni.

Ka hmangaih, ka tan vul reng lai, min hmangaih leh hmangaih lo zawh che hi ka duh reng a, “Ka hmangaih che,” tiin min chhang zel thei reng bawk la tih hi ka duhthusam a ni.

How Would You Feel
- Ed Sheeran -
You are the one girl
And you know that it's true
I'm feeling younger
Every time that I'm alone with you
We were sitting in a parked car
Stealing kisses in the front yard
We got questions we should not ask but
How would you feel, if I told you I loved you?
It's just something that I want to do
I'll be taking my time, spending my life
Falling deeper in love with you
So tell me that you love me too
In the summer, as the lilacs bloom
Love flows deeper than the river
Every moment that I spend with you
We were sat upon our best friend's roof
I had both of my arms round you
Watching the sunrise replace the moon
How would you feel, if I told you I loved you?
It's just something that I want to do
I'll be taking my time, spending my life
Falling deeper in love with you

Kan in

Lian deuh atana it châng hi ka ngah mai.

Hmun rem lo tak, kawtzawl pawh a nei lo a ni. A chhungah mi hip thei thil kan kawl chu sawi loh, mi neih ang kan nei pha lo zawk, thingpui tih loh chu.

Nikhua ka hriat ve tirh ata kan in hi lun loh lai a nei lo thung. Naupang chumchiap ka nih lai atangin ka patea te, ka ni fate, ka nutei te leh ka putea te tih ang reng hian min chenchilh deuh reng a. Tlema kan unau kan leikân ve deuh chinah kan thiante an lawi lut nasa a, a bikin ka thiante hi an ngampa zualin ka hre thin, tun thleng hian.

Rui leh mi ang pha zân lote pawh an lo lawi lut fo va, tumah lungawi lova chhuak ta hi ka la hre lo.

Inleng lut kan tam vanglai tak tak phei chuan a neitute hian thutna kan chang lo fo va, inleng thenkhat phei chu pawna an awm a ngai hial a; ka farnute hian thingpui hi khawhar ina sem ang deuh tak taka semin, "Chang lo tunge la awm?" tih lauh lauh châng an ngah mai.

Ngampa tak tak pawh an tam a, kan fridge-a ei tur awm ang ang hi an it zawng a nih chuan min dil lo, an ei mai; min dilin ei phal lo pawh ni ila an ei loh phah chuang lo vang. Rawn lut tawrha chawbel zen nghal ngawng ngawng te, mahni thingpui tur in chhuan mai te pawh an awm a. "Zanin tlaiah chaw ka rawn ei ang," tia min hrilh lawkte hi chu bengvar angreng tak an ni.

Wifi password-te hi han thlak ve sateh thin mah ila, an hai chhuak tho tho!!

A kawi zawnga ngai duhtu tan chuan chhungkaw inawpna mumal lo, duh duha pal darh theih, chhungkua pawh vawng zahawm thei lo kan nihna chen pawh a awm ang. Mahse, chuti lo zawnga chhut chuan malsawmna a ni ve tho ka ti thin.

Kan chhiat, kan thatah kan ina lawi lutte hi kan rinchhan, kan inhnemna, min puitu an ni a; an tana ui nei lo chhungkua (ka insawi thei mah mah em aw?) tan hian a tul hunah min tlanchhiatsan ngai lo.

Ka pa khan a damlai khan, "Keini in chhe tê-a lo lawi lut duhte chu hnar reng reng loh tur, an ei an in avangin kan nghei lo vang," a ti a. A sawi ang takin tumah hnar kan neih ka la hre lo va, kan nghei phah tâk pawh ka hre hek lo.

Kan in hian hmel mawina nei lo mah se a nuam ve viau a nia!