Zân a ni a, zan dang zawng aiin boruak a vawt zual a. Inah hian ka tangkai lo khawp a, ka awm khât deuh bâkah ka awm ve chhun pawhin mahni hna thawkin ka khâwlthluaknei hmaah ka thu ngawt ngawt a, ei huna eia in huna in leh tawp mai thin ka ni.
Chutiang chu ni mah ila zânin kher chu a vawt êm a, kei ngial pawh ka chêt chhuah a ngai a ni. Ka farnute meilum chhêm kan nghah chuan khaw vawt hian min hmet hlum hman mai dawn takngial nia ka hriat avângin kan sumhmuna meihawl leh sikri chu chuhin meilum chhêm turin ka phek chhuak ve ta hial a ni.
Chutih lai chuan kan kawt chhak deuh maiah chuan râwlthar rual hian khaw vawt hre ve lo niâwm tak hian tingtang ri dik kim mang lo hian Krismas hla an lo sa kal rawih rawih a, ‘Kumpui sûl a lo vei châng hian...’ tiin a kêl râwla kêl râwlin an lo zai nasa mai.
Ka inham belmang lai tak chuan ka phone chu a lo ri tat tat a, laklawh pawi sawi lovin rang fahranin ka ipte ka zen a, message min thawntu hming chu ka’n en zuai a, ka mi nghah hming chu ka zu hmu a. Ka che vêl pawh ka phur sawt, chhiar mai lovin mei chu ka nun phawt a, a kan kaiah ka chhiar ta chauh va.
Phur êm êmin ka inbox chu ka hawng a; mahse, phur ang a ni lo. A ni lo mai a ni lo, ka nunkhua zawng zawng min thlâksak vek thei hial dâwn tlat. Chu ka inbox-ah chuan nula hnên atanga nichin maia ka dawn, “Lo lên tum buai duh tawh lo mai rawh,” tih chu a lo awm kalh a.
Ni e, tun ni li vêl kal ta atang khân he nula nen hian kan inbe mumal thei lo tan a, a thiam lo zâwk nia ka inhriat avângin theihtâwpin a chinfel dân tur pawh ka zawng. Message ka thawn tam zâwk min chhâng duh lo va, ka call pawh a la duh lo fo; a lâk chhun pawhin a rûl tâwk chauh zêlin min chhâng a, thil sawipui a har a ni. “Ka laklawk êm mai, duhtâwk rih phawt ang, nakinah kan la sawi dâwn nia,” tih chu a tawngkam ka hriat zin ber a ni a, ‘nakin’ a tih chhûngin heti chen hi hun a liam ta.
Ka beidawng duh chuang lo va, a thiante kaltlang tala biak ka tum a, ka beih ngial hnuah pawh ka hlawhchham lo chauh zêl. Tun ni li vêl chhung hi he nula biak tum hian ka hmanhlel a, a vêlah hian tlangvâl puitling, mahni theihna laiah chuan induh ve larh thin hi ka thên kual vêl mai mai a ni ber.
Zânin tlai thlengin ka la beidawng duh chuang lo va, zanriah ei dâwna message ka thawn chu min chhâng tawh dâwn lo emaw ka tih hnuah ka rin loh deuhvin min rawn chhâng a, min chhân dân lah chu a duhawm lo êm êm zui bawk.
Chhûn lama ka hnathawk hi ka haw tlai deuh thin avâng hian zânah hian mi mut hun dâwn tawh âwm vêlah hian ka lêng chhuak ve thei deuh chauh fo va, zânina ka message dawn ang deuh chi hi chu ka tlai deuh tum leh chhûn lama ani a lo hah ve deuh tum chuan ka dawng fo, zânin erawh chu a dang a ni. ‘Buai’ leh ‘tawh’ tih thumal pahnih hian min tibuai zual.
Message ka thawn leh hrâm a; mahse, min chhâng zui duh ta lo.
Ka lum pup pup a, nichin lawka thlan tla lo chauhva vawt tia khur khân vawt ka hre tawh lo, ka sahâl nghâl huam huam ringawt.
Ni, a âwm a ni. Kei hi tlangvâl vânduai chi hi ka ni ve hrim hrim a. Ngaihzâwng hi nei ve nual tawh mah ila Krismas vuakvêtah hian ka âwl hlauh zêl. He nula nen pawh hian kum hnih dâwn inkawp tawh mah ila Krismas kan la hmang dun lo: nikumah khân work camp-in ka kalsan a, a kum lehah lah a pu boral kum a nih avângin a nute khaw lamah an hmang bawk si. Kuminah erawh chuan, Krismas hma ni 10 awrh thlengin harsatna kan la nei lo va, kekawr pawh min la leipui!! Tunah erawh a dang ta.
Nula chu sawi loh, hmeichhia hrim hrim zîngah hian ani ang hi ka la tawng lo. Ka tlangvâlpui tam takin an sêp rawtui thin - a vun ngo no chek te, a khabe kual invuah fuh êm êm mai leh a hmui chung lama inhmeh êm êma khuavâng a neih te, a nuih zâwnga a ha var rual tak lo langte leh a biangsum lo lang thin te; a mitmeng, fiah lo niâwm taka bûi deuh lek lek, mi dangin pu se tuma inhmeh zawh loh tur, en chiana amah chei bertu ni si leh fiah kâk lawi si te, a pian tâwk tek tawk tak maite chu nei kher lo pawh ni se, a nunphung leh khawsazia chu ka tân dampui tham a ni a, thihpui tlâk a ni bawk.
Kei hian mi ka ang lo nge mi hian min ang lo pawh ka hre lo. Hmangaihna lamah hian hmêl leh pian te, hausakna an tihte hi engah vak ka ngai lo. Tunlaia ka thalaipui tam takten hmêl an dah pawimawh lutuk tate hi ka lo haw thin. Ka laka hmangaihna hmêl tilang tam apiang hi ka tân chuan an mawi a, an hmêl pawh a tha ti tlattu ka ni.
Ka message dawn chuan thui tak min hruai a, Valzotea angin kan tuanna thin mualte chu a takin va fang kher lo mah ila ka thinlung mitthlaah a lang zut zut a. Kumin furpui laia Dâwrpui pheia nihliap tereuhtê khuma ruahpui vânâwn hnuaia kan kal dun lai te; ka pheikhawk thar ka bun tuma an kawt nâl leh ka pheikhawk hnuai lo inmil lo lutuk avânga chiang êm êma a hmai hma ngeia pa tak maia ka thal tawp lai chen chuan a lo lang zut zut a. A tel lova ka awm theih loh ang hian ani hi ka tel lo hian a awm thei bîk tihna em ni ang, a ni thei lo. Ni thei leh si, ani chuan a thei mai ang, kei erawh hi... ngaihtuah zui tur ka awm lo, ka chiang lutuk!!
A tân chuan ka ni ve kher em tih chu ka hre, ka tân erawh chuan ka khawvêl a ni a; a vir ang angin ka vir a, a hawi lam chu ka en thin a ni a, a thlêkna lam chu ka tan lamte an ni mai. Amahah hian ka awm a, keimahah hian a awm bawk. Ka tul ve êm êm nia ka inhriat nite hian ka lo theihnghilh palh a ni tih ka hre chhuak leh ziahte hian ka kiangah a awm reng a ni tih a tichiang tâwkin ka hria.
Kan thenawm hnaia râwlthar rual hlim lutukte chuan ka thin an tirim zo va, an zai pawh tuiin ka ngaithla thei tawh lo.
Mahse,
‘Awm lai vei leh lusên fate chantâwk hi dâwn ve teh,
Hnutiang mual lian hnu hi ngaiin an tap e;
Par ang an lawm hnu he ni ropui lo thlen hian,
Chhûng kim dar ang lên lai kha ngai zualin, tapin luaithlipui an nûl ngei ang,’ tih chu an rawn sa thleng.
Ka mesasge dawnin min den aia nain chu hla châng chuan min rawn dêng ta.
*************
Khua a thim sawlh sawlh tawh a, mi chhungkaw Krismas châkkhai lam haw, an fate niâwm tak, naupangte nena hlim taka an in an panna kiangah chuan kan in, vêng mawnga mi chu ka êm rawih tawh lam nen chuan ka pan ve hnak hnak a.
Mite chu an duh leiin an haw, an duh tak lei haw kher lote pawh chu a leina an neih loh vâng ni lovin an duh an hmuh zawh loh vâng a ni tih ka chiang êm êm a, ka awt a ni.
Ka êm mawngah chuan dâl Rs 10.00 man leh anhnah têl hnih a let ngât a, chu chu kan chhungkuain zanriah atân leh naktûk nilênga kan rin tur chu a ni, a bâk duhin ei châk mah ila, ka thawh chhuah sumin a daih lo.
Ina ka fate lo awm tur chu ka mitthla a, nizâna kan mut hmuna kan thenawm nauten vawiin lama an Krismas thawmhnaw tur leh an lâwm an lei dâwn tih an sawi laite chu ka ngaihtuah kîr a, naupang mai mah ni se an awt ve thu an sawi duh bîk lo; mahse, engmah sawi lova an ngawihna chuan ka mittui a ko chhuak a, sawi se ka hau emaw a ni ang, an sawi lova min vêl leh bawk si!!
Pêk theih ka duh êm êm chu ka ril-a rahte chu ka pe thei si lo, tui taka mi leh ka fate an mut hnuah hian hnathawh chauh vâng ni si lo hian ka va hah thin tak!!
Pathian hian kan chungah zah a ngai a, chhuan chham êm chuan min siam bîk lo. Pasal suna ka fate pathum, a lian ber pawh Pâwl 6 zir chauh châwm mah ni ila ka taksa a chak a, hmeichhia mai mah ni ila ka fate zirna mamawh tâwk leh chhum tur chu kan la nei ve zêl. “Thawk na na na chu Pathian pawh hian kan nghei a lo phal lo a ni,” ka ti thin.
Mahse, hunpui a lo inher chhuak a. Mite chu kum tîr atanga intuak kher lo pawhin an duh chu an thla khat lâk luhin an lei thei vek; kei erawh chu kum tluana ka tang fat fat chung pawhin Krismas tûka sa leina tur mai mai pawh ka khâwl ngah zo hman ang em tih chu ka la chiang thei lo cheu mai si.
Kal pah chuan ngaihtuah loh loh ka ngaihtuah a, “A pa khân vânduaina tâwk lovin min la dampui ni se, hetiang êm êm hi kan ni lo tur,” te chu ka'n ti rilru leh ngawt thin. Mite angin duh duh lei pha lo mah ila, anin min dampui lai kha chuan Krismas tûkah kha chuan chhung kimin kawr thar kan ha chhuak thei vek a, sa pawh kan ei ve thin a nih kha maw le!! Tunah chuan a va dang ta.
“Mami pa, i fate châwm zo lova rualawt rêng rênga ka siam hi min ngaidam rawh aw!!”
****************
Kan thenawma râwlthar rual hla sak chuan min den nat êm avângin ka tho zawk a, ka meilum chhêm pawh ngaihsak zui tawh lovin inah ka tlan lût a. Ka farnuten, “I jacket hman thiam,” min tihsak mai, ka hâk than êm êm mai chu la lawkin engmah pawh sawi chuang lovin ka chhuak lehnghâl a. Ka nu’n ka kalna tur min rawn zawh leh pawh chuan, “Thiante inah,” ti chauhvin ka chhâng hman tawh.
Nula lamin ka rilru a la tawh lo. Nula nena Krismas ka hman dâwn loh avângin kei chu vânduai ka inti a, pawi ka ti. Mite chu kum tluanin an lo vânduai thei dâwn a ni tih ka lo hre ngai lo va, chu ka hla ngaihthlak chuan min hrilh a, ka hre chhuak thar ta thut a ni.
Chapo thu ni lo sela, kei chuan ka duh duh ka lei thei a, a tula ka nula-i tihlâwm theihna a nih dâwn phei chuan ka sum zawng zawng pawh ka hmang zo phal ang. Mahse, chu ngawt chu a ni lo.
Tuna hunpui hlim taka hman tuma ka er mek lai hian kan bul hnaiah hian lusûn khawhar hnem ngai an awm ang. Lusun êm an awm loh pawhin he Krismas avânga lungngai êm êm nu leh pa, sual vâng ni hauh si lova an fate duh phuhruksak zo lo an awm dâwn chiang lutuk tih chu ka hre thar ta thut a ni.
Kawnga kal pah chuan thin thate chu message ka thawn zung zung a, innghahkhâwmna tur hmun hrilhin, “Tun atanga minute 15-ah chuan thlen hman vek tur,” ka ti hlawm ta. Kei pawh chu hmanhnawm êm êmin ka phe hlawk hlawk bawk.
******************
Kan in ka lût a, naupangte chuan an tih dân pângngaiin min lo lâwm chiah chiah a, engmah an duhzâwng ka hâwn dâwn lo a ni tih an chian tlân tawh avângin tumahin chu lam chu an ngaihsak lo. Ka fanu lian ber chuan chaw bêl a lo suan chiah a, ka chawhmeh hawn chu zânina kan hmeh nghâl tur a nih avângin ka phawrh a, lo buaipui zui turin ka ti a.
Ka intifai thuak thuak a, darkar chanve vêl hnuah chuan zanriah chu kan ei ve ta.
Zanriah kan ei lai chuan naupangho chuan vawiina kan thenawm naute thil leh thar chanchin chu an sawi sap sap a, engtin mah ka chhâng lo. Nizâna an lei dâwn tih an sawi lai ang bawkin tumah chuan an awh ve thu an la sawi chuang lo.
Zânriah kan ei kham a, khua chu mi seh ngawt ngawt khawpa vawt ni mah se ei tur pawh nei mumal lo tân meilum chu vâna rah ang a ni. Naupangte chuan kumin kum tîr lama kan Kohhran Hmeichhehovin jumble sale an buatsaiha mi ka leisak, an kawrlum chhuanawm lo tak tak chu an ha far a, keiin kum li vêl ka lo rin tawh ka puanbah lum (shawl) chu bâtin thutthlengsei kan neih chhunah chuan kan nufa za chuan engmah sawi lovin kan \hu ngawi thap a.
Naupang rilru thianghlim tak takte hmêl chu ka en thin a, an tâna nu nih ka tlin lo ngawih ngawih niin ka inhria a, ka thinlung chhungril ber atangin ka indem a ni. Kan tukverh atanga thenawmten Krismas lawm nâna êng mawi tak tak an tihphêt chu ka en ngar ngar a, keini chhûng chuan kan mamawh ngawih ngawih, meilum chhêm alh tur takngial pawh kan neih loh laiin anni chuan an kawt thlengin an tiêng uar mai si. Ka hawina lam apiangah chuan lungawi loh chhan tur tha tâwk tak ka hmu nghâl zêl a ni ber mai.
*****************
Keni thianho hi pariat lai kan ni a, tlangvâl puitling thah tawh, mahnia intungnung thei rual thah kan ni tawh chung hian tumah hi tla fâl hi kan awm ngai meuh lo. Zâninah ngei pawh hian ka message thawn avâng chuan kan thianho zînga pakhat inah chuan minute 20 hnu velah chuan kan kim thap a, a then phei chuan min lo thlen khalh leh hman hial zâwk.
Nula nena kan inkar boruak chu an hriat vek tawh avângin chu lam chu a nih an lo ring fur a; a nih loh thu ka sawi pawhin a tîrah chuan an âwih mai lo. Awm pawh a âwm viau, khati khawp khân kan inzui ve a, eng emaw thu pakhat inbahfuh loh vâng mai maia inthen tur ngawt chuan min ring bîk lo, kei pawhin ka inring bîk lo.
Ni e, ka thiani chungchângah chuan kei pawhin sawi tur tam tak chu ka nei. Kan inkar boruak kal zel chu hrilh duh pawh tam tak ka nei; mahse, chu lam chu zâninah hian ka rilru-ah engmah a lang lo. An beisei loh deuh thil ka sawi ta thung a.
A tîrah chuan ka thil rawt chu pahnih khat chuan tha an tih loh vâng ni lovin, tul an tih tehchiam loh thu an sawi. An tih tur âwm rêng pawh an ti a tih thei ang. Kei hi hetiang lam ngaihsak lo tak ka ni a, hna lama kan rim deuh chu thuhran nise, ka hman reng pawhin Kohhran leh khawtlâng tân hian ka tangkai lo êm êm a, keimah atang hian Kristian tha takte tih tur âwm ang tak hi ti tura beiseina pawh an lo nei lo pawh a ni mai thei.
Kan sawi kan sawi a, darkar chanve âwm vêl hnuah chuan kan ‘aw’ tlâng thei ta. Kan Branch YMA hruaitute zînga a phone no. kan neih chhun chu kan be ta nghâl a.
*******************
A la hma viau na a, chhûn lamah ka hah deuh avâng leh khua a vawh êm avângin mut mai chu a tha tawh hle niin ka hria a, naupangte pawh chu an kun deuh lap tawh a, kan ‘pang ber phei chu ka mal chungah chuan a mu bâm tawh a. Khua chu a vawt bawk a ni ang, khawlai thâwm pawh a reh a, tlangval lêng chhuak peih pawh an awm lo emaw tih hial tur a ni.
Kan kawtah chuan pên ri a lo ri khut khut a, kan in hi vêng mawng tlabirha awm a nih avâng hian a bul hnaia chêngte bâk hian kan kawt kawng hi kan zawh ngai meuh lo va, tun ang hunah phei chuan reh thei tawh tak a ni.
Pên thâwm chu a dang riau va, chutiang ang huna kan kawt kawng rawn zawh an awm hrim hrim pawh mak tih tawh naka laiin an thawm chuan kan in chu an rawn pan tlat ni hian ka hria a, naupangte hriat chiah si loh chuan ka tang deuh hru a.
Beisei deuh si, ring ngam chiah si lova ka awm lai chuan kan kawngkhar chu an rawn sawi dawt dawt a, naupangho pawh chuan mak an ti a ni ang, an meng phâwk deuh hru a. “Ngawi rawh lawk a, ka rawn hawng e,” tih pahin ka tho va, ka va hawng ta a.
Tlangval lian ziah zuah tak tak paruk lai hi kan sumhmunah chuan an lo ding thuau va, “Lo lût rawh u,” pawh ka tih hmain an rawn lût nghâl a. Ka lo rin dân mai mai chuan, vêng mawnga awm tiin a in chhe berah hian zu in tur an rawn zawng dâwn ni ngeiin ka lo ngai hmanhmawh pek a!!
Chutia hamhaih vânga engmah sawi lova kan ngawih reng lai kawtah chuan thâwm a lo ri leh khut khut a, tlangval zînga pakhat chuan kawng chu va hawng vatin tlangval pahnih hian thil rih hmêl deuh hi an rawn zâwn lût tawih tawih a, kan kawngka bul, in chhûng chin siah chuan an nghat ta dawt a, ka bangbo telh telh mai.
Ka fate nena thil awmzia hre lo lutuka kan awm lai leh eng ber nge thleng ta pawh hre lova kan ngawih thap lai chuan an zînga pakhat chuan, “Ka pi, min hre hlawm em?” a rawn ti ta a.
Keia hamhaih leh mak ti bawk si chuan, “A... aw, hria e. Aih..., ka hre lo che u. Kan vênga mi em ni in nih a?” ka lo ti buh nuai a.
Ani chuan, “Aw, ni e, min hre lo chu a lâwmawm nasat chu. Kan rawn thâwng thut cheu va, min lo hre thiam dâwn nia; thutlûkna kan siam har bâkah kan inrawn khâwm tlai deuh atin ni. A zia lo khawp mai,” a ti a.
Ka bangbo telh telh mai.
“Ka pi, hei kan hriat angin Lal piancham lo thleng tur chu ni nga emaw chauhvin min dang ta a. Kum tîr atanga erin hman nawm loh hlau rêng rêngin kan khawsa a; nangni pawh chutiang bawk chu in ni ang tih kan ring. Tichuan, zâninah mai khan keini thianho hi kan inrâwnkhâwm a, kumin chu kan pawisa neih ang angte hi mahnia hmang ral mai lovin mi dangte tân theh chhuak ve teh ang u. Hei zat hi Krismas kan lo hmang tawh a, kan nawmsakna tur ringawt kan lo ngaihtuah thin. A piancham kan lawmsak hian mahni insengsovin, a nun hlan hial tur a ni tih inhre chungin a lo kal a ni si a, keinin a piancham kan lo lawm dân leh kan lo hmuah dân nen hian a inpersan ta êm mai tiin kan vêng chhûnga keini aia harsa zâwkte tanpui tha kan ti tlang a. Zâninah pawh hian in in kan rawn thleng ta a ni,” tiin rawn lut hnunghnung pahnih zînga pakhat zâwk chuan a rawn ti chhuak ta a.
An rawn luh tirha tawng hmasa ber chuan, “Ni e, ka pi. Zânina kan thil rawn tih hi a tam thei hauh lo mai a, nangni hian tlâwmah lain ‘Tanpui kan ngai lo ve,’ pawh min lo ti ang tih kan hlau khawp mai a, keini hi kan inthlahrung êm êm zâwk a ni tih min hriatsak ula kan duh a ni. Kan neihnun êm avânga he thil hi ti kan ni lo va, kan biak Pathian hian kawr pahnih kan neih chuan a nei lo hnêna pe tura min tih miau avângin kan Krismas hmanna tur ai tiin kan neih ang ang theh khâwm mai kan ni,” tiin a rawn sawi zawm a.
Engmah ka sawi ve hma chuan pakhat dang a lo tawng leh a, “Keini nawmsak loh hlauva he hun kan hmuaha kan hman mek lai hian, kan kiang lawkah hian sum leh pai leh khawharna avâng te, natna avângtea he hun lo thleng tur huphurh êm êm an awm tih ngaihtuahna hi kha chen kha kan lo nei tawh lo thin. Kan inngaihtuah chiang a, dam vur chunga ngaihzâwng hmanpui theih dâwn loh vâng mai maia kan buai chung lai hian, keini tawrh aia nasa daih tuar an lo awm reng mai si. Keini thianho hian zânina kan thil tih hi ti turin kan inrawt chhuak ta a ni,” a rawn ti ve a.
Asawi mawlh mawlh lai chuan a jacket ipte chu a zen a, lehkha ip (envelope)-a fun thil a rawn phawrh a, “Ka pi, khawngaihin min dawnsak hram rawh,” tih leh hnialna hun pawh awm aih lovin ka kut leh chu lehkha ip chu a hmehbel nghâl a, “Hei in ai lum tur, meihawl bag khat nen hian aw..,” a ti zui a, ka dawng chu a ni deuh nghâl der mai.
Mumalin ka awm thei meuh lo, ka lâwmna nge nasa anga ka mak tihna, khawi lam malsâwmna nge a nih pawh ka chhiar thiam tawh meuh lo. Buh deuh nuaih bawkin, “A va mak teh thut ve, min tibuai zo vek mai. A..., engpawh ni se, kan lâwm. Kan chhûngkua hi hei hi kan ni mai a, kan mangang takzet a ni. Min tanpui a, kan lâwm a ni mai e. Sawi tur ber pawh ka hre lo,” tiin kan pa boral tawh dânte pawh ka hrilh ta nualin ka hria.
Ka sawi ve pawh chu an ngaithla lo, ka sawi lai lai chuan a then chu pâwnah an lo chhuak hman a, lâwmthu sawi nân thingpui sen tal lum ka’n tum vei nen, “A ngai lo, kalna tur kan la nei nual si,” tih leh chhuah an rual a, chelh hman pawh an ni lo.
An chhuak fel a, ka harh zawk a, ka mittui a tla nghal zawih zawih a. Naupangin min biakna pawh ka chhâng thei lo. Lâwm lutuk avâng hian mittui a tla thei a ni tih ka vawi khat hriatna a ni.
*******************
Tlawh tura kan inruahman kan zawha ka haw chuan a lo tlai tawh fû mai. Vêng mawng tlabirh fang kan ni bawk a, kea kal ngai vak lo nih nen, ka chau kher mai.
Ka mu nghâl a, zânina kan tlawhte bâkah khan kan bul hnai mai ni si-ah kan tlawhte aia nuamsa bîk hauh lo tam tak an va awm dâwn chiang em!! Anmahni ngaihtuahna avângin ka muhil mai thei lo va, an harsatna chu zu hriatthiampui vek lo mah ila ka tawrhpui a ni. Chutih rualin zânin ang rêng rênga ka hlim zân hi ka la tawng lo. He leilung luaha malsâwmna min pêk chhan ang chu zâninah ngei hian, min chhandam tura a fapa a rawn tirh champha denchhen ngeiin ka ti niin ka inhria a, ka lâwm a ni.
Mi hnêna thilpêk kan hlan hian a ropui leh ropui loh chu kan thil pêkah ni lovin, a petu rilruah zâwkah a awm a ni tihte chiang takin ka zir chhuak ta bawk.
Krismas ka hman tawh azawngah ka hman nawm ber tum a ni zui a. Isua kiangah, a thupek pakhat tihlawhtling chunga hun ka hman miau avângin nuam ti lo thei ka lo ni lo. Amah nena a piancham lawm zet zawng, bialnute piancham lawm nen chuan a inang lo chiang. Tisa thilah chuan a ropui lo zâwk pawh a ni thei, a nawm leh a hlimawm thuah erawh chuan eng nen maha tehkhin ka phal lo.
Hunpui a lo thlen hian, keiin ho ka tih hi mi tân a ho lo tih ka hre thar a. Krismas vuakvêt lo thleng thin lo huphurh êm êm hi an awm kum tin ang, chu’ng mite chunga ‘eng emaw’ tih chu Kristian thalaite tih tur âwm tak niin ka hre thar ta a; chutiang tih chu amah nen ngeia a piancham lawmna tha ber a lo ni.
November 8, 2010 (Thawhtanni)
Dar 12:59 AM
