Ka tawng che hi vânnei ka inti asin

Zan a ni a, zan rei pawh a la ni lo. I mi hriat angin kei chu awm âwl hlek chuan i tulzia pawh ngaihtuah lova mut hmuna lehkhabu kâwm chawt zel ka ni a. Kan mut pindan piah chiaha kan inleng kawmna pindanah chuan nang chuan naupang lehkha zir i vil a, i nau awih paha i zai kal leh rât rât thin thâwm leh i zai thiam loh em em dân chu ka hriat hnu a nih avângin ka ngaihven tehchiam lo.

Dik tak chuan Kohhran thalaia kan inhmanho lai pawhin, ‘Keini pahnih hi chu tel lo ta ila kan zaipâwl hruaitute hi an lâwm zâwk mah ang a?’ tih tur chi kha kan ni dun tih ka hria a; mahse, zai thiam hi nupa nunah hian thil pawimawh chu ni sela chuan zanin hi kan thleng lo vang tih hi kan zai thiam loh nupa zia ka hriat chian tluk zetin ka chiang a. Hei mai bâkah hian nupa hlimna tur hian hmel leh pianzia tangkai nepzia pawh ka hria. I hmel leh pian hi chhia ka ti tihna a ni lo, nang anga hmeltha hi ka la tawng lo va, tawng pawh ni ila nang i nih loh chuan tha pawh ka ti chuang lo vang.

Hmel leh pian chu hmangaihnain a ken tel ve mai chauh a ni a, tunlai thalaiten heti tak maia an buaipui leh hmangaihna zâwk an dah hniam ta lek lek mai hi nâ ka ti ru thin. Hmeltha leh pian nalh chu lo hmangaih mai pawh an awl mahna, thui tak ka hre lo; mahse, nang nena kan inkar ang hi a nih dâwn chuan si loh chuan engah mah ka ngai chuang lo vang.

Engkim hi hmangaihna nen chuan a nuam a, chu chu nang hian ka lakah hian i nei tlat a ni. Engkim mai hi min hmangaih vângin min tihsak a, nang chuan hmangaihna hmel leh pian i put miau avâng hian i tha thlâwt a, ka lo tawng che hi vânnei ka inti a ni.

Nang chu fanu mal, tet lai atanga kehthei dawma i chenpuite zawng zawng bâkah, in laichinte pawhin an dawm che i ni a, i lo no deuh a nih pawhin ka hre thiam khawp ang che. Kei tlangvâl naran, mahni hlawh neih ve chhun pawh kham mang lo, châwmhlawm an tih ang aia changkâng deuh awrh chauh hi eng vânga min nei mai nge i nih ka ngaihtuah chet chet hian, a mak tih mai loh chu sawi tur a awm pawhin ka hre lo.

Ka tawngkam thiamah i tawlhthlu a ni lo tih lah ka chiang a, hminga koh pawha ‘eih’ tih nachâng hre tâwk tâwk khawpa tawngkam thiam loh vânga tawng tlem ka ni. Ka rîm ngawrh em vâng che a nih lohzia lah chu sawi ngai lovin, kan inneih dâwn thlenga kan inngaizâwng a ni tih hre mang an lo awm te khân a tichiang viau bawk si.

Heng zawng zawng ka ngaihtuah hian, keini ang inchhunga lâwi tura nang ka tawng mai che hi vânnei ka inti a sin.

Kan han innei ta che’ng a, hriat thiam ngaia ka awm zin zia chu i hriat kha. Pa chekngel âwmtê si hi ka haihawt em em reng mai a, keimah pawh hi ka intheihnghilh lo chauh a ni fo. Ka nupui fanaute châwmna tura ka hnathawh ve lah hi haihawt ngaithei lo ber chi a ni satliah mai lo va, engkim chiang taka hriat ngai chi zâwk a lo ni si. Kei aiin ka hna hi thawk ta zâwk la, kan pute mit pawh hi i tlung zâwk ngei ngei ang ka ti fo thin.

Heng zawng zawngah hian nang chuan mi pângngai chhuahin min chhuah a, ka thawhpuite phei chuan hetiang em ema thil ka theihnghilh ngai ta lo hi mak an tih ve ka ring thin a; min hawhtîr phal ngai loh an nihliap hial min hawhtîr phal tawh dânah hian, sawi lo mah se a chiangin ka hria.

Kan ina i chen ve hmaa ka pendrive leh eng ilo, ken chhuah ngei ngei ngai tur ang chi apiang mai theihnghilh thin kha ka nih laiin, tunah erawh chuan ka ngaihtuah ngai miah tawh lo leh ka ipteah a awm a ni tih pawh ka hriat loh laiin, a tul hunah phawrh mai theihin a lo awm zel tawh mai. Nang ka lo tawng kher che hi vânnei ka inti a, mi pângngaiah leh rintlâkah nang hian min chhuah a ni.

Ka nunkhua kha min dâwn letpui ve ngai em? Kha ka hun tawn tawh zawng zawng kha. Kei chu mi chhe daikil kara mi, inhlawh chawpa intunnung hram hram, he khawvel thil chhuan tur pakhat mah nei lo ka nih thin kha. Tuna kan dinhmun hi enin kan inchhung bungruate hi han thlir teh, heng zawng zawng hi nangmah vânga kan neih a ni ka ti lo thei lo. Kei hi sum thawk chhuaktu chu ka ni ngei mai, ka pha lo; mahse, nangni lovin mi dang kutah ka hlawh hi chhunglut thin ta ila, hetiang hi kan nih ka ring lo.

Tunah hian mite angin kawtkai atanga lirthei chung khuh nei chi hawl chhuah tur chu kan la nei pha hauh lo; mahse, hmâna mite ta tur chauh emaw ka lo tih thin kha tunah chuan nangmah vângin ‘kan ta’ a ni ve ta teuh mai.

Mite chuan an chhuang lo che pawh a ni thei, kei erawh hi chuan ka chhuang che a, sum leh pai khawih lama zirna sâng zawng zawng zir chhuak, tuna kan Aizâwl khawpuia nula tam tak ai hian ka hlawh chhuah sum hmanga kan inchhung enkawl tur hi chuan nang hi ka ring zâwk che tih hi ka la hrilh ngai lo che a nih pawhin he thu ziak hmang hian ka hrilh a che. Nang ka tawng kher che hi vânnei ka inti em em asin.

Ka dinhmun ka thlir a, Kohhran leh khawtlânga hawlh lawr takah mi hian min neih roh lehnghâl a, heng zawng zawng pawh nang ka tawn vâng vek che a ni.

Tunah hian ka tlangvâl lai ka ngaihtuah let a, khatih lai khân ka damlo a nih ngawt loh chuan thlan laih ka thulh ngai ka hre lo va, mitthi lumenna leh khawhar ina ka kal lohna in hi kâwk dâwn ila, kawh tur ka hre tlem ngawt mai. Mahse, khatih hun laia tlangvâl tlâwmngai tia mite hriat hlawh ngai hauh si lo khân, nang vânga ka dinhmun insiam nasatzia hi en ve teh.

Nang hi i tawng thei a, hruaitute bula i pasal i fak chiam chiam thu ka hre lo, chutiang chuan i ti bawk hek lo vang tih hi ka chiang; mahse, nupui fel tak nei thei chu mi pawh hian min lo ring ni ngei tur a ni. Tun hi ka thleng ta hial mai.

Tunah hian mite angin chhangchhe nu leh pa kan lo ni ta. Ka duh ang tak maia fanau min han hrinsakte hian a nia min tilâwm ni. Kan fanu neihchhun lah hian tu dang chhun lovin a nu ngei a chhun che a, hei ngawt pawh hi ka hnathawk haw hi i awm loh pawhin hahdamthlâk ka tih phah a ni.

Heng kan rila rah, kan fate hi nang ang rilru, hmangaihna chauh dah lian a, pâwn lam mawina chauh zawng lova chhungril thatna zawng zâwk mi an nih a, i biak thin Pathian hi Pathian nung a ni tih hre chunga nunkhua an hman chhoh theih nân theihtâwp i chhuah dun ang aw!!

Bawihi, kan hmachhawp hi a la tam tiraw? Nang tela lova paltlang tur nia ka indah chhin pawh hian patling tia mite sawi ni tawh mah ila, dawih aw chhuah loh chu harsa ka va ti rua em!! Nang chu nang i ni miau va, mi dangte nupui ang i nih ve loh tlat avângin i tel ve dâwn chuan engkim hi ka huam a, kan inrîm thin laia engmah tiam ngam ve ngai lo che kha tunah chuan ka bulah nang i awm tawh miau avângin engkim hi ka cho em em vek a, min tihpui dâwn tih ka hriat miau avângin tihtheih loh ka neih pawh ka inring tawh lo hial mai ka ti. Nangmah vâng vek a ni!!

Kan nun hi i ngaihtuah ve ngai em, ka hre lo. Thihnate hi kan chanvo a ni lo emaw tih mai palh a awl ngawt mai; mahse, en teh, piang tawh apiangten thia an chhuahsan thin khawvel hi keini pawh hian kan la chhuahsan ve dâwn khawp. Ni e, kan la thi em em ang, a chiang a ni.

Thih hi ka hreh a ni lo va, ka kalna tur hi ka thlahlel lo a ni lo. He khawvel thil, ropuina te leh mite thlakhlelh em em tam tak zîngah hian engmah he khawvel chhuahsan ka hreh chhan tur ka hmu lo, nang chauh lo chu!! Nang hmu tawh lo kumkhua tura ka indah chhin ngawt pawh hian....., thui pawh ka ngaihtuah ngam lo ve!!

Vanramte pawh an sawi a, keini nupa pawhin muthmunah pawh kan sawi dun ve thin kha, a nuam ngawt ang. Mahse, Bawihi, nang aia thleng hmasain khi hmunah khian lo han lâwilut hmasa ta pawh ni ila, nang i la awm ve dâwn rih miau loh avângin ka tân hian a nuam zo ve tak tak ang em tih hi ka suangtuah fo thin.

“Em em a?” pawh i ti mai thei, mite phei chuan hria se min dem hial ang; mahse, nang hi an nupui ni ve ta la, kei ai hian an ropui lua bîk kherin kei chuan ka ring hauh lo.

Khawvela mihring vânnei ber chu a hmangaih ber nei theitu hi a ni a, khawvela mi awhawm ber chu amah hmangaih bertu nei theitu hi a ni thung.

Kei hi khawvela mi vânnei ber leh mi awhawm ber chu ka ni kawp a ni. Ka hmangaih ber, nang ka nei thei che a, ka vânnei a; min hmangaih bertu ka nei bawk che, mi awhawm ber ka ni.

Heng zawng zawng ka ngaihtuah hian, nang ka tawng che hi vânnei ka inti em em a, he khawvelah hian ka lo piang lo vang tih ka hlau em em asin.

Oct. 16, 2010 (Inrinni)

11:21 PM